Protocolo de EF

Neste curso as clases de EF serán bastante diferentes ao habitual. Comezamos por difundir o protocolo do centro, na páxina 23 atoparedes a sección adicada a Educación Física. Deixámos tamén o cartel para lembrar algunha destas novas normas.

EF na casa #QuedaNaCasa

Volvemos a darlle uso ao blog despois dun tempo parado debido ao avance do virus covid-19 en Galicia, e que provocou que o 12 de Marzo a Xunta de Galicia decidira que os colexios estarían pechados, en principio, ata o 27 de Marzo. Esta medida está acompañada coa obriga de permanecer nas nosas casas durante este período (#QuedaNaCasa)
Por este motivo queremos que a través da E.F. poidamos seguir traballando, na medida do posible, os contidos que estabamos realizando en clase; ademais, achegamos distintos recursos cos que estar activos/as e pasar o tempo que deberemos estar na casa.
Establecede un horario no que dedicarlle tempo a estas tarefas, podedes ter como referencia as horas ás que tiñades E.F., pero tamén recomendamos a realización de actividade física diaria, ben sexa as recomendadas nesta presentación ou outras.
Nesta presentación están os recursos planificados para 1º - 2º - 3º e 4º de E.P. polos mestres/as de E.F. Carlos, Noemí e Diego.

 Ánimo, pronto voltaremos a vernos!

Agachados na sombra

Photo by Eric Patnoudes on Unsplash

Os nenos/as de 3º de E.P. desenvolverán o superpoder de ser invisibles e agacharse nas sombras. Nesta misión aprenderemos o que é o teatro de sombras e a utilizalo para representar distintas figuras, que transmitan diferentes accións ou personaxes.

Bailamos!

Photo by Ahmad Odeh on Unsplash

Os incribles tamén gostan da música, por este motivo hai unha carta que dá dereito a escoller a música que se utiliza en clase de educación física. Hoxe bailamos e xogamos coa lista que elaborou unha alumna de 2ºC, utilizando o dereito que lle daba a carta que gañou. Para que todos poidades escoitar e comprobar o bo gusto musical deixámosvos a lista de reprodución, xa vos avanzo que máis nenos/as están preparando as súas eleccións para clase.

Descubrimos os nosos poderes

Photo by Diego PH on Unsplash

Iniciamos a segunda misión na que tentaremos descubrir e comezar a dominar os superpoderes que posúen os nenos/as incribles do CEIP Emilia Pardo Bazán. Os nenos/as de segundo teñen que dominar as técnicas de estar quietos e inmóviles para pasar inadvertidos e ser invisbles, pola súa parte os incribles de terceiro teñen que coñecer o seu corpo á perfección, coñecer as articulacións e algúns músculos, así como saber utilizar e orientarse á esquerda e á dereita.

Subindo chanzos

Photo by Jake Hills on Unsplash

Moitos de vós xa estades chegando ao mínimo de puntos para poder cambialos por cartas lendarias, pero tamén podedes utilizalos para obter temporalmente as cartas de privilexio. Presentámosvos o álbum que contén estas cartas para que consultedes se queredes aforrar os puntos para algunha destas ou ben gastalos.

O álbum dos incribles

Photo by Wayne Low on Unsplash

Presentámosvos o Álbum das cartas lendarias que se poden ir coleccionando, ata o momento hai un total de 14 cartas lendarias, pero ao longo do curso poderá haber máis.

Se pasades o rato por enriba do cadrado aparecerá o modelo da carta que podedes conseguir.

Exposición de superheroes

Ata o 29 de setembro na sede da Afundación estará aberta unha exposición sobre a presenza dos superheroes na banda deseñada. O título da exposición é "Superpoderes" e recolle obras dos debuxantes David Aja e David Rubín.

Se aínda non a visitastes podedes facelo de 17 a 21 h. na sede de Afundación no Cantón Grande.

Apurade e tomade apuntes para os vosos superpoderes!

Misión "Enrolámonos no Equipo Incrible"

Photo by TK Hammonds on Unsplash

O Equipo Incrible estará composto por nenos e nenas de 2º e 3º de Primaria que queren desenvolver os seus poderes para poder librar á cidade dos perigos que a ameazan. Un requisito para poder formar parte deste equipo será posuír o carné de Incrible, no que escribiredes o nome e os superpoderes que quereredes desenvolver. Con este carné identificarédevos para entrar nos adestramentos que faremos na Escola dos Incribles.

Seremos Incribles!

Fonte wikimedia Licenza CC0 DP

Iniciamos unha nova aventura, na que a través das clases de Educación Física nos converteremos en superheroes e superheroínas. Ao longo do curso iredes gañando cartas cada vez que rematemos unha misión, estas cartas servirán para coleccionalas e tamén para xogar. No primeiro trimestre haberá catro misións que vos axudarán como adestramento para ser Incribles.